Topeng

Foto menika rikala kula wonten Mirota Batik badhe tumbas gantungan kunci ananging kula pengen ningali topeng ingkang dipun pajang wonten sakiwa tengening rak-rak wonten Mirota Batik menika.

Band ingkang kula remeni

Foto menika rikala kula ningali konser band ingkang kula remeni inggih menika fourtwenty wonten TBY (Taman Budaya Yogyakarta)

FKY

Menika foto kula lan kanca kula namanipun Wuri lan Ruska wonten FKY (Festival Kesenian Yogyakarta) panggenipun wonten Bantul.

Hutan Pinus Dlingo

Foto menika rikala kula lan kanca kula namanipun Wuri lan Ara plesir wonten Hutan Pinus, Dlingo, Bantul.

Mie Nyinyir

Mie Nyinyir

Kaya jenenge mie nyinyir, rasane pedes banget. Mie iki isa dituku ning Jalan Godean km 4,5 cedhak Giant. Warung Mie Nyinyir ana ing sisih tengen yen kowe saka wetan. Regane ya murah ming 7500 kanggo miene lan 2500 yen arep ditambah topping kayata ayam teriyaki, ayam jamur lan liya-liyane. Ing kene ya disediakke ombenan kayata teh, jeruk lan liya-liyane. Rasane lumayan enak, yen kowe ora seneng pedes ana mie original yaiku mie sing ora diwenehi sambel ananging yen koe seneng pedhes ana mie nyinyir level 30. 

Kaliurang

Kaliurang

Dina minggu Aku dolan ning omahe Wuri ing Tempel. Omahe lumayan adoh tak tempuh kanggo montor kira-kira 30 menit. Tekan omahe Wuri aku disuguhi akeh banget panganan kayata lempeng, salak, peyek lan liya-liyane. Karo mangan panganan sing wis disuguhi Aku lan Wuri cerita-cerita ananging saya suwe saya bosen banjur Wuri muni "Ul ayo neng Kaliurang wae" "Ya ayo Wur ketoke penak banget iki nek mrana" saurku. Banjur Wuri salin klambi sing luwih wangun dianggo lunga "Ayo Ul aku uwis siap" banjur Aku lan Wuri numpak motorku sing tak parkir neng ngarep omahe Wuri. Aku lan Wuri ora pamit wong tuwane Wuri amarga lagi ning sawah. Ora suwe saka omahe Wuri tekan Kaliurang namung 15 menit. Aku lan Wuri banjur markir motor lan mlebu Wisata Kaliurang. Hawane adem banget, akeh uwit-uwitan ning kana. Banjur Aku lan Wuri foto-foto lan lingguhan karo mubengi Kaliurang. "Subhanallah endahe pandamel-Mu Gusti.." kandhaku.

Ponakanku sing Ayu Dhewe

Ponakanku sing Ayu Dhewe

Aku duwe ponakan. Bocahe ayu tapi kemayu. Ya kepeneran kaya jeneng e, Kenes Ayu Rengganis Yudhantoro sing duwe teges putrine Pak Yudhantoro sing ayu lan kemayu. Kenes bocahe iyik banget, apa-apa ditekoni tapi kuwi awujud kapinterane bocah pengen reti apa-apa. Kenes seneng banget gawe uwong liya guyu karo polahe. Kenes saben dina dolan ning omahku, nek wis neng jero omah mesthi sing digoleki kursi biru banjur mengko ditumpaki karo diseret-seret rana rene karo guya guyu dhewe. 

Ketemu Artis

Ketemu Artis

Aku lan Nica ketemu artis jeneng e Dion Wiyaka ing Pasti. Mas Dion Wiyaka pemain FTV luwih bagus raine nek delok langsung timbang saka tivi. Rasane bungah banget.

Museum Sonobudaya

Museum Sonobudoyo

Aku lan kanca-kanca kelas PBD B 2016 lunga menyang Museum Sonobudoyo amarga entuk tugas saka dosen dikongkon delok naskah jawa kuna. Museum Sonobudoyo panggone ana ing cedhak Alun-Alun Utara. Aku mrana bonceng numpak motor e kancaku jeneng e Nica. Ora patio adoh saka kampus tekan Museum Sonobudoyo namung 15 menit. Aku lan kanca-kancaku mlebu Museum Sonobudoyo sakdurung e bayar sikik, regane tiket 3000 rupiah per uwong ananing amarga Aku lan kanca-kancaku rombongan dadi entuk diskon dadi 2500 per uwong. Neng njero museum akeh banget barang-barang pra sejarah kayata duit jaman bien, kapak persegi lan liya-liyane. Nanging Aku lan kanca-kanca ora lali tujuan e awakdhewe mrene yaiku delok naskah jawa kuna. Banjur Aku lan kanca-kanca takon marang sing jaga banjur sing jaga duduhake panggon sing dinggo nyimpen naskah jawa kuna lan didelokke Aku lan kanca-kancaku. Sakwise Aku lan kanca-kancaku foto kanggo bukti kanggo dosen e supaya percaya banjur mulih. 

Resensi Serat Pedhalangan Lampahan Harjuna Wiwaha

Resensi Serat Pedhalangan Lampahan Harjuna Wiwaha

Identitas Buku

1.     Irah-Irahan            :         Serat Pedhalangan Lampahan Harjuna Wiwaha

2.     Panganggit            :         Diyono, BA.

3.     Panerbit                 :         CV. Cendrawasih

4.     Kacithak Wonten  :         Sukoharjo

5.     Kacithak Warsa     :         1997

6.     Cacahing Kaca      :         156 Kaca

Serat Pedhalangan Lampahan Harjuna Wiwaha dening Diyono, BA menika nyariosaken lampahing Raden Harjuna. Lampahan Harjuna Wiwaha menika nggadhahi teges “Perkawinan Harjuna” syair menika dipun serat dening Mpu Kanwa ingkang gesang nalika jaman Raja Airlangga, raja wonten Jawa Timur warsa 1019-1042. Harjuna menika salah satunggaling lakon saking Mahabharata. Wonten menika ipun cariosaken kados pundi Harjuna tapa brata wonten redi Himalaya gadhah kekarepan supados pikantun kasaktian kangge merangi para gandarwa. Lampahan Harjuna Wiwaha menika dipun damel kanthi adhedhasar pangertosan buku antawisipun lampahan Makutharama babon Ki Wignyosutarno, lampahan Irawan rabi dening Ki Noyowirongko alias Atmocendhono, serat lampahan Dewaruci dening Sudarko S.Kar. lan buku sulukan dening Ki Darsomartono lan sanes-sanesipun.

Wonten pambuka menika dipun cariosaken menawi dalemipun para Dewa utawi Bathara Indra dipun ancem kaliyan para Gandarwa ingkang dipun pimpin dening raja ingkang kagungan nama Niwata Kawaca. Namung tiyang sekti ingkang saged mupusaken kadurjanan menika. Piyambakipun sampun siap kangge nyerang lan nremukake kahyangan Bathara Indra. Niwatakawaca boten saged dipunkawonaken kaliyan sinten kemawon, mbok menika Dewa utawi buta sanesipun. Amargi menika, Bathara Indra badhe nyuwun biyantu kaliyan tiyang kangge nglawan buta kasebat. Tiyang ingkang dipun suwuni pitulung menika namanipun Arjuna putra tengah Pandawa ingkang kala semanten saweg mertapa wonten Gunung Indrakila.

            Ananging sakderengipun Bathara Indra nguji kasabaran Harjuna menawi nglampahi tapanipun. Pitu widadari ingkang ayu-ayu dtimbali kangge nglampahi tugas menika. Widadari ingkang langkung wigati saking pitu widadari menika namanipun Suprabha lan Tilottama ananging boten saged godhani Harjuna. Saklajengipun rajanipun para Dewa inggih menika Dewa Indra ingkang badhe nguji Harjuna.Dewa Indra menika muncul dados wujud Resi ingkang dukani Hrjuna menawi tapa brata Harjuna ingkang sampun dilampahi menika namung ngoyak pambebasan piyambakipun. Harjuna mangsuli menawi kaslametan piyambak menika sanes ancasipun, ananging kaslametan tiyang sanesipun. Dheweke kepengin biyantu kaluwarganipun saking perang pungkasanipun. Raja Gandarwa badhe mateni Harjuna, Dheweke ngutus celeng ingkang gadhah nama Momong Murkakangge ganggoni tapa Harjuna ananging Harjuna saged mateni celeng kasebat. Ananging nalika Harjuna ngeculke panah, Bathara Siwa ugi ngeculake panah dening celeng kasebat satemah kalih-kalihipun panah wau dados setunggal lan mateni celeng kasebat. Lajeng padha rebutan sinten ingkang mateni celeng kasebat. Menika ugi ujian kangge Harjuna, boten kepareng sombong. Ananging Harjuna saged ngliwati ujian kasebat lan dipunparingi panah ajaib ingkang gadhah nama Pasopati. Lan tapa bratanipun sampun pungkasan.

            Utusan saking khayangan dhateng nyuwun pambiyantu saking Harjuna kangge perang lawan Niwata Kawaca. Harjuna boten seneng ananging tetep sarujuk. Dipun damel rencana kangge perang menika. Kaliyan biyantu saking widadari Supraba ingkang sampun dipun lamar dening raja Gandarwa lajeng Harjuna mangertos rahasia Niwata Kawaca menawi pucuk ilathinipun kena dheweke bakal mati. Lajeng perangipun dipuntindhakake lan Harjuna saged ngeculke panahipun lan ngenani lathinipun Niwata Kawaca lan mati.

Kekurangan

1.      Bahasa ingkang dipun angge angel dipun mangertosi

2.      Kertas ingkang dipun angge buram satemah angel dipun waos

3.      Boten wonten daftar isinipun

Kelebihan

1.      Isinipun sampun lengkap

2.      Sampulipun sae amargi gadhah kathah werna werni

3.       wonten kathah tuladha ingkang saged dipun tuladha saking serat menika

Pasisir Somandeng

Pasisir Somandeng

Dinten minggu menika kula lan kanca-kanca badhe bidhal Pasisir Somandeng. Kula nyuwun pamit kaliyan Bapak lan Ibu wonten griya lan nyuwun arta kangge sangu lan tumbas bensin nalika wonten margi. Kula lan kanca-kanca Kula kempal wonten MAN Yogyakarta 3 amargi sampun nyaguhi kempal wonten mriku tabuh 7. Sakderengipun bidhal Kula lan kanca-kanca ngecek sepedhah montoripun ingkang badhe dipun titih dhateng Pesisir Somandeng. Nyambi nengga kanca-kanca sanesipun kempal Kula lan kanca-kanca ingkang sampun dugi Kula lan kanca-kanca nedhi wonten burjo ngajeng MAN Yogyakarta 3 menika Kula mangan omelet kaliyan ngombe es jeruk. Saklajengipun kanca-kanca sanesipun sampun dugi MAN Yogyakarta 3 lan Kula lan kanca-kanca numpaki sepedhah motor piyambak-piyambak lan ingkang boten beta menika bonceng wonten kanca ingkang beta sapedhah motoripun. Kula lan kanca-kanca bidhal tabuh 9. Saking MAN Yogyakarta 3 dumugi Pasisir Somandeng menika betahaken wekdal 2 jam. Kula lan kanca-kanca dugi Pasisir Somandeng tabuh 11.

Dumugi Pasisir Somandeng Kula lan kanca-kanca markir montor wonten panggenan ingkang sampun dipuncawisake. Saklajengipun Kula lan kanca-kanca lenggah wonten gubug ingkang celak saking Pasisir Somandeng menika. Nembe sekedhap mireng suara azan wonten mushola jejeripun gubug menika. Kula lan kanca-kanca sholat rumiyin lajeng Kula la kanca-kanca nedhi malih wonten warung amargi tanaganipun sampun telas wonten margi kala wau. Saklajengipun Kula lan kanca-kanca gantos rasukan wonten pakiwan lan dolanan wonten Pasisir Somandeng. Kula lan kanca-kanca nglangi wonten pasisir menika lan dolanan wedhi dumugi sonten. Saklajengipun Kula lan kanca-kanca adus lan selfie wonten celak parkiran sapedhah montor lajeng wangsul. Sakderengipun wangsul Kula lan kanca-kanca mampir wonten Pathuk. Wonten Pathuk menika wonten wisata namanipun Bukit Bintang, wonten mriku kita saged ningali Kutha Ngayogyakarta saking nginggil. Kathah lampu ingkang saged kita tingal sinambi nedhi dhaharan wonten warung-warung Bukit Bintang menika. Dhaharan menika werni-werni, wonten sega goreng, mie godhog, jagung bakar lan sakpanunggalane. Wonten unjukan ugi inggih menika teh anget, es jeruk, jahe anget lan sakpanunggalane. Saklajengipun Kula lan kanca-kanca wangsul wonten griyanipun piyambak-piyambak.

Arung Jeram ing Kali Elo

Arung Jeram ing Kali Elo

Aku, Adekku lan Ibukku lunga menyang sekolahane Adekku. Mergane sekolahane Adekku arep nganakke outbond neng Magelang. Bapakku ora melu amarga lagi kerja. Jam 9 esuk Aku, Adekku lan Ibukku wis tekan sekolahane Adekku banjur mlebu bis sing wis dicepakke. 1,5 jam wis tekan ing Kali Elo, Magelang. Ing kana Aku lan Adekku arung jeram. Ibukku ora melu amarga ra nggawa klambi kanggo salin. Arung jeram e asik tenan. Klambi lan awakku klebus kabeh kena banyu. Sakwise arung jeram banjur aku lan Adekku salin klambi sing wis dicepakke ing tas sing tak gawa. Bubar salin Aku, Adekku, Ibukku lan sak rombongan saka sekolah e Adekku mulih Jogja maneh. 

Wedhus Jawaku

Wedhus Jawaku 

Aku nduwe wedhus jawa

Warnane putih, ireng lan coklat

Saben dina tak pakani suket lan godhong nangka

Wedhusku lulut banget

Ora tau gelem bijig

Wes tekan wayahe

Idul adha saya cedhak

Aku seneng karo wedhusku

Nanging aku luwih sayang karo Gustiku

Wedhusku tak ikhlaske

Kanggo kurban nggo uwong sek butuhake

Muga-muga isa kanggo tabunganku

Mlebu swarga karo keluargaku

Takbiran

Takbiran

Takbiran kuwi adat istiadat saka uwong islam ing Indonesia. Takbiran dilakoni ing wayah wengi sakdurung e idul adha. Biasane takbiran dipengeti kanthi cara mubengi desa karo ngucapke "Allahu Akbar Allahu Akbar Allahu Akbar Laailaahailallahu Allahu Akbar Allahu Akbar Walillahilham" sambi nggawa obor utawa lampion.

Lemut

Lemut

Ing sawijining dina Ifah bali saka sekolah. Sakwise bali Iffah lingguhan neng teras omah karo nyelonjorke sikil amarga kesel banget, awak e pegel kabeh pengen banget rasane turu tapi uwis sore. Jarene ora oleh turu sore-sore amarga isa gampang pikun. Lagi wae nyelonjorke sikil reti-reti mak clekit, Ifah kaget banjur tangane nabok awak e sek kerasa lara mau. Ditiliki jebul ana lemut sing nyokot ing sikile. Ifah muring-muring dhewe banjur muni "kurang ajar, ora reti po nek aku lagi kesel malah dicokoti" karo nabok-nabok lemute sing uwis mati mau ngasi gepeng. Banjur Ifah lingguhan meneh let sedhilit mak clekit meneh jebul lemut e pindhah panggon sing nyokot saiki neng tangane banjur ditabok meneh karo Ifah. Lemute saya akeh sing nyokoti Ifah "woalaaah iki jenenge mati satu tumbuh seribu, kok akeh tenan lemute yo apa mergo aku durung adus" banjur Ifah menyat saka lingguhan langsung adus supaya ora dicokoti lemut meneh.

Lombok Ijo

Lombok Ijo

Ing wayah isuk Aku lan Adhiku nandur lombok neng ngarep omah. Winih e digaringke banjur disebar ono ing besek. Sakwise thukul winih e banjur dipindah ono ing polybag. Saben dina ing wayah isuk lan sore Aku lan Adhiku gentenan nyirami tanduran lombok kasebut. Suwe-suwe lombokku soyo mundhak dhuwur lan subur. Lombok e padha njedhul akeh banget teng grandul ijo-ijo durung ngasi abang uwis dithotholi pitik. Ibukku banjur ngekon aku lan Adhiku methiki lombok iku sing ijo-ijo mergane timbang dithotholi pitik mending dinggo nyambel Ibukku. Sakwise lombok dipethiki saka uwit e banjur diresiki lan dikumbah banjur dilebokke blender bareng karo tomat, brambang lan bawang sakwise diblender dilebokke wajan lan dicampur karo uyah lan gula jawa.

Kodok Ngorek

Kodok Ngorek

Kodok ngorek kodok ngorek

Ngorek pinggir kali

Teyot teblung teyot teblung

Teyot teyot teblung

Bocah pinter bocah pinter

Besok dadi dokter

Numpak apa numpak apa

Numpak kapal kabur

Bocah bodo bocah bodo

Jaluk dijamoni

Jamu apa jamu ap

Temulawak pahit

Kodok ngorek kodok ngorek

Ngorek pinggir kali

Teyot teblung teyot teblung

Teyot teyot teblung

Resensi Serat Pepeling lan Pamrayoga

Resensi Serat Pepeling lan Pamrayoga

Identitas Buku

1.       Judul Buku                  : Serat Pepeling lan Pamrayoga
2.      Penulis                         : Jayawigata

                                              Hardjana HP (Alih Aksara)

3.      Penerbit                       : Proyek Penerbitan Buku Sastra Indonesia dan Daerah

4.      Tahun Terbit                : 1980

5.    Tempat Terbit              : Jakarta

6.    Ketebalan Buku          : 64 halaman

Ringkasan Buku

            Buku kanthi judul “SERAT PEPELING LAN PAMRAYOGA” dening Jayawigata menika nyariosaken babagan pepeling lan pamrayoga kangge tiyang alit ingkang taksih kekirangan seserepan lan kangge panuntuning lampah supados boten klentu ancer-anceripun ingkang sinedyakaken. Buku menika dipun damel mawi sekar nanging tembungipun jaria kemawon sarta pangiketing sekaripun inggih namung uger jangkep wicalanipun sarta angsal guru lagu lan guru wilangan.

            Ing wekdal menika masarakat Jawi sampun sami katuwuhan wijining manah rukun sarta sami sumedya angangkah majeng. Ing pundi-pundi kathah ingkang sami ngedekaken pakempalan. Tujuning sedyanipun angangkah rukun sarta majeng ing panggesangan. Nanging sedaya pakempalan wau dumuginipun menika kenginginipun wastani sampun sami dereng saged kalampahan sedyanipun. Amargi tumindak masarakat Jawinipun dereng saged sae kados suraosing pranatanipun.

            Mbok menawi amargi kathah saking warganipun ingkang ndherek pakempalan menika dereng sumerepdhateng jejering pikajenganipun angangkah majeng. Malah kathah ingkang klentu serep, tindak lan tandukipun namung nuwuhanken kaborosan lan  boten miturut unggah ungguh masarakat Jawi, satemah sami katingal wewah rakaos panggesanganipun. Bilih leresipun sedaya wau kedah sami kaserep-serepaken saperlunipun dening masarakat Jawi ingkang sampun sami kapilih dados pangajeng. Nanging kathah masarakat Jawi ingkang dados para pangajeng wau boten saged kasahit pangerehipun, wekasan masarakat Jawi wau kathah ingkang anyimpang margi, boten miturut pikajengipun pakempalan .

Kekurangan Buku

1.   .Pepeling lan pamrayoga menika sampun sae ananging menawi dipunterapaken wonten masarakat Jawi ing era modern menika langkung angel amargi kahanan wonten masarakat Jawi era modern menika beda kaliyan masarakat Jawi wonten jaman rumiyin.
2.     Basa ingkang dipunginakaken angel dipunpahami kedahipun ngangge bahasa dipunginakaken saben dina kemawon.
3.     Sampul buku menika kirang menarik kedahipun dipun damel ngangge kathah werna werninipun.

Kelebihan Buku

1.      Buku menika sampun komplit ngewrat babagan pepeling lan pamrayoga.

2.      Buku menika ugi sae dipuncaosi arti kangge basa Indonesia supados tiyang ingkang boten kedah basa Jawa saged mangertos isinipun buku menika.

3.      Buku menika sae kangge referensi menawi badhe ndamel makalah utawi karya ilmiah.