Mata Kuliah Pungkasan

Nalika pungkasan mata kuliah Sosio-Antropologi Pendidikan kaliyan Ibu Aris Martiana S.Pd., M.Si.

Candi Gedong Songo

Nalika Kula wonten Candi Gedong Songo.

Kawah Dasamuka

Nalika Kula wonten Kawah Dasamuka

Kula lan Arum Tanggap Warsa

Nalika kula lan kanca kula namanipun Arum tanggap warsa lan dipuncaosi hadiah dolanan kangge tiyang alit. Kula ngguyu kemekelen.

Pentas Akhir Kepengurusan

Nalika PAK utawi Pentas Akhir Kepengurusan Hima Jawa.

Udan

Udan

Tumetese banyu udan
Ngelingake aku dek jaman semono
Rekasane sliramu
Kanggo nemoni awakku
Direwangi klebus
Ananging ora nggawe koe mundur
Esemmu sing mesthi mok delokke neng aku
Manuk-manuk padha ngiyup
Uwong-uwong padha mlayu
Ananging sliramu tetep nggenjot pit onthelmu
Karo ngguya ngguyu
Amarga arep ketemu awakku
Dalan sing peteng ora dadi alangan
Bledek sing teng jeder ora kalebu rintangan
Sing penting sliramu bisa ketemu awakku
Matur nuwun kang mas
Kanggo tresnamu sing gemati iku

Tembung Aran, Kriya lan Kahanan

No	Tembung Aran Kata Benda	Tembung Kriya Kata Kerja	Tembung Kahanan Kata Sifat
1.	Suket	Netes	Adhem
2.	Banyu	Mili	Ijo
3.	Kayu	Bebarengan	Teles
4.	Manuk	Keceh	Grimis
5.	Watu	Tumemplek	Ijo Enom
6.	Lemah	Mlayu	Soklat Rada Ireng
7.	Wedhi	Senggol	Sembribit
8.	Angin	Sorot	Seger
9.	Kembang Kemboja	Bukak	Kuning
10.	Kates	Kena	Akeh
11.	Pelem	Mabur	Banter
12.	Palem	Jejer	Alon-Alon
13.	Gelombang Cinta	Nyuwara	Pating Tlolor
14.	Oyot	Tiba	Gedhe
15.	Wit Gedhang	Mumbul	Gumandhul
16.	Kurungan	Midhun	Sumilir
17.	Lampu	Munggah	Mentiung
18l	Cagak	Cemruwit	Cilik
19.	Kabel	Delok	Klebus
20.	Gendheng	Nabuh	Alus

Ega

Nalika kanca kula namanipun Ega tanggap warsa lajeng kula lan kanca-kanca menehi roti.

Cerkak Kesusu

Kesusu

Dina iki dina senin, jam pitu kurang limalas menit Aku lagi tangi. Ngendikane Ibuk Aku uwis digugah jam lima nanging aku ora tangi-tangi. Aku muring-muring marang Ibuk “Lah Buk, kok Kula boten digugah to? Kula sakniki sekolah lho”. 

“Lha wong kowe ket mau digugah lawange ngasi tak gedhor-gedhor yo ora tangi kok nyalahke Ibuk”. Wangsulane Ibuk. Senajan isih ngantuk Aku tangi gemregah banjur tumuju kamar mandi nyaut andhuk karo mbatin “Ah wes jam semene cetha telat iki wahjan”.

 Banjur aku adus bebek ora ngasi limang menit uwis rampung. Sakwise rampung adus Aku ganti klambi biasa lan nyetrika klambi sragam sing arep tak anggo, nyetrikane yo ora ana niatan babarblas ming nyetrika lan panggon klambi sragam sing isa ditutupi kerudung ora tak setrika. Rampung nyetrika banjur klambi sragame tak anggo karo mikir kurang apa maneh yo. Malah kelingan, mambengi Aku lali nata jadwal “Ealah Gusti kok yo nganggo acara lali nata jadwal barang to” langsung buku-buku sing dibutuhake tak lebokke tasku banjur salim karo Ibuk.

 Bapak ning ngarep omah uwis bengak-bengok “Yaaaak, sida diterke sekolah ora? Lek uwis, wis jam pitu kliwat iki lho”. “Inggih pak, sekedhap Kula nembe ngagem sepatu niki lho”. Rampung nganggo sepatu banjur bonceng motore Bapak, karo Bapak langsung diselah lan digas “Pak sik banter nggih, Kula sampun telat niki” “Lha wis reti dina Senin wayahe sekolah kok tangine karipan ki kepiye, yo ora nyalahke Bapak nek numpak alon-alon. Salahmu dhewe kok digugah yo ora tangi-tangi”. Aku ming nyethuthuk karo enggah enggih wae, amarga aku rumangsa nek Aku sing salah ora oleh nyalahke wong liya.

Ananging ning atiku rasane deg-degan wedi nek mengko tekan sekolah malah ora oleh mlebu amarga wes ditutup gerbange. Banjur Bapakku ngebut amarga ngerasa mesaake karo aku. Aku bungah banget tapi Aku meneng wae amarga wedi nek ganggu konsentrasine Bapak. Saking ngebute motor e Bapak pas penggokan motore ngasi miring, ora isa diendani aku anjlog seka motore Bapak ananging Bapak tetep ngegas motore. Untunge aku ora tiba ananging aku ndredeg ra karuan amarga kaget banjur malah dadi bingung, Bapak uwis bablas lan aku ditinggal ning penggokan banjur Aku mlayu banter banget nututi Bapak lan ngundang “Bapaaaaak.. Bapaaaaak.. Bapaaaaak..  Aku ketinggalan” uwis ora urusan karo uwong-uwong sing ndelokke, ana sing ngguyukke barang. Pikiranku wes tumuju Bapak sing bablas lan piye carane lehku menyang sekolah. Suwe-suwe lehku mlayu saya alon amarga wis kesel, kringetku nggrojog kaya banyu ning kali. Banjur Aku mlaku dhewe, tak tiliki jam sing ana ning hpku jebul wis jam setengah wolu. Lemes,lara, bingung, mumet, kesel, mangkel dadi siji ra karuan banjur aku lingguh ana ing trotoar  “Wislah rasah menyang sekolah, wis jam semene, ditinggal, rupaku yo wis ra karuan, bariki bali wae lah”. 

Rada suwi aku lingguh ning kono banjur aku balik arah ora tumuju sekolah ananging tumuju omah, lagi pirang  jangkah ana motor ngampiri Aku. Jebul kuwi Bapak “Woalah yak tak goleki kowe ki, kok yo isa malah ning kene to kowe ki? Wong mau boncengan karo Bapak lho” “Lha wau pas penggokan Kula dhawah, Pak” “Lha kok iso tiba ki kepiye? Kok senengane aneh-aneh to kowe ki” Wangsulane Bapak bingung. “Wau Bapak menggoke kemiringen banjur Kula anjlog saking motor” “Ana sing lara ora?” “Boten Pak, ananging sakniki sampun telat Kula diterke wangsul mawon” “Woalah nduk nduk, iki kabeh mergane apa jal? Merga kowe ora disiplin, wayahe sekolah kudune reti kewajiban sing kudu ditindakke, ora usah dikongkon maneh. Tangi gasik yo kudu saben dina ora ming nek arep sekolah wae to nduk. Wes gedhe kudune saya mikir saya gedhe barang tanggung jawabe. Wis dina iki ora sekolah ora popo. Dinggo pelajaran nggih nduk sisuk maneh aja dibaleni” karo ngembik-embik arep nangis banjur tak wangsuli “Inggih pak, Kula nyuwun pangapunten nggih”.

Taksih maba

Foto menika rikala kula lan kanca kula inggih menika Nica taksih maba utawi mahasiswa enggal. Foto menika dipun pendhet wonten ngajengipun rektorat UNY.

Sega Kucing

Foto menika inggih menika sega kucing. Miturut kula menapa dipun sebat sega kucing amargi porsi ingkang dipun samektakaken. Sega kucing saged dipun panggih wonten angkringan. Sega kucing isinipun ugi werni-werni inggih menika wonten teri, jangan kacang panjang utawi oseng tempe.

Syawalan

Foto menika rikala kula lan kanca-kanca kula saking kelas 12 MAN Yogyakarta 3 ngawontenaken syawalan wonten griyanipun kanca kula inggih menika Fachri.

PBD B 2016

Foto menika rikala kula taksih mahasiswa enggal kaliyan kanca-kanca kula saking PBD (Pendidikan Bahasa Daerah) kelas B 2016 UNY (Universitas Negeri Yogyakarta). Kelas kula wonten 22 tiyang, 5 tiyang jaler lan 17 tiyang estri.

Adhiku Pentas

Foto menika rikala kula sak keluawarga ningali adhi estri kula rikala pentas wonten Stadion Kridosono.

Monjali

Foto menika rikala kula lan kanca-kanca kula namanipun Nica, Arum lan Ega wonten saklebeting Monjali utawi Monumen Jogja Kembali.

Khataman

Foto menika rikala kula lan kanca-kanca kula kataman wulan ramadhan.

Sunmor

Foto menika rikala kula lan kanca-kanca kula wonten sunmor utawi sunday morning wonten marginipun UNY celak Fakultas Teknik.

Warung Makan

Foto menika nalika kula lan kanca kula namanipun Ruska lan Momon madosi warung makan seafood lan mangan wonten mrika

Sowan

Foto menika rikala kula lan keluwarga ageng kula sowan dhateng budhe kula wonten Bantul.

Promnight

Foto menika rikala kula lan kanca-kanca saking MAN Yogyakarta 3 ngawontenaken promnight. Promnight menika adicara kangge perpisahan kaliyan kanca-kanca saking MAN Yogyakarya 3 amargi badhe lulus lan nglajengaken pendidikanipun piyambak-piyambak.

Sesima

Foto menika rikala kula ndherek sesima kaliyan HIMA Jawa wonten Desa Wonomulya, Seyegan, Sleman, Yogyakarta. Wonten foto menika tiyang jaler ingkang dipun pacaki dados tiyang wadong kangge pawai ngubengi desa menika lan kathah tiyang sanesipun ngagem rasukan werni-werni lan bekta gunungan ingkang dipun bekta dumugi lapangan ingkang celak saking desanipun.

Pangkur

Ayo nembang sesarengan..


Pangkur

Nimas ratu kalinyamat
Tilar wisma sumengka angganing wukir
Tapa wuda sinjang rambut
Aneng gunung danaraja
Apratignya tan arsa tapihan ingsun
Yen tan antuk adiling hyang
Patine sedulur mami

Megatruh

Ayo nembang sesarengan..


Megatruh

Sigra milir sang gethek sinangga bajul
Kawan dasa kang njageni
Ing ngarsa miwah ing pungkur
Tanapi ing kanan kiring
Sang gethek lampahnya alon

Asmarandana

Ayo nembang sesarengan..


Asmarandana

Anjasmara ari mami
Mas mira kulaka warta
Dasihmu tan wurung layon
Aneng kutha purbalingga
Prang tandhing lan wurubisma
Kariya mukti wong ayu
Pun kakang pamit palastra

Sinom Rujak Jeruk

Ayo nembang sesarengan..


Sinom Rujak Jeruk

Angadhang ing tengah lawang
Rajang-rajang iris-iris
Kawula reracik rujak
Tan kendhat tansah cecawis
Mugi dadiya jampi
Rujake kinecer jeruk
Ing layah lambah-lambah
Gula jawa lombok rawit
Ora suwe bapakne thole wis teka

Dhandhanggula

Ayo nembang sesarengan..

Dhandhanggula

Semut ireng anak-anak sapi
Kebo bongkang nyabrang ing bengawan
Keyong godhang trak sungute
Timun pikulan wolu
Surabaya geger kepati
Geger wong moyak macan
Den wadhahi bumbung
Alun-alun kartasura
Gajah mita cinancang wit sidagari
Mati cineker ayam

Pucung

Ayo nembang sesarengan..

Pucung

Ilmu iku kelakone kanthi laku
Lekase lawan kas
Tegese kas nyantosani
Setya budya pangekese dur angkara

Gambuh

Ayo nembang sesarengan..


Gambuh

Sekar gambuh ping catur
Kang cinatur polah kang kalantur
Tanpa tutur katula tula katali
Kadaluwarsa katutuh
Kapatuh pan dadi awon

Aja nganti kabanjur
Sabarang polah kang ora jujur
Yen kabanjur sayekti kojur tan becik
Becik ngupaya iku
Ing pitutur kang sayektos

Tutur bener puniku
Sayektine apantes tiniru
Nadyan metu saking wong sudra papeki
Lanum becik nggone muruk
Iku pantes sira anggo

Ana pocapanipun
Adiguna adigang adigung
Pan adigang kidang adigung pan esthi
Adiguna ula iku
Telu pisan mati sampyoh

Si kidang umbagipun
Ngendelaken kebat lompatipun
Pan si gajah ngendelaken ageng inggil
Ula ngendelaken iku
Mandine kalamun nyakot

(Serat Wulangreh, Sinuwun Paku Buwana IV)

Kinanthi

Ayo nembang sesarengan..


Kinanthi

Padha gulangen ing kalbu
Ing sasmita amrih lantip
Aja pijir mangan nendra
Kaprawiran den kaesthi
Pesonen sarira nira
Cegah dhahar lawan guling

Nalika MAN

Foto menika nalika kula taksih kelas 12 sekolah wonten MAN Yogyakarta 3.

Tebing Breksi

Foto menika rikala kula lan kanca kula namanipun Wuri lan Ara plesir wonten Tebing Breksi, Yogyakarta.

Tenun Lurik

Foto menika rikala kula lan kanca-kanca setunggal kelompok observasi wonten Lurik Kembang Maju Mandiri wonten Moyudan, Godean, Sleman, Yogyakarta.

Solo

Foto menika rikala kula plesir wonten Solo, Jawa Tengah. Kula foto saking becak ingkang kula tumpaki.

Topeng

Foto menika rikala kula wonten Mirota Batik badhe tumbas gantungan kunci ananging kula pengen ningali topeng ingkang dipun pajang wonten sakiwa tengening rak-rak wonten Mirota Batik menika.

Band ingkang kula remeni

Foto menika rikala kula ningali konser band ingkang kula remeni inggih menika fourtwenty wonten TBY (Taman Budaya Yogyakarta)

FKY

Menika foto kula lan kanca kula namanipun Wuri lan Ruska wonten FKY (Festival Kesenian Yogyakarta) panggenipun wonten Bantul.

Hutan Pinus Dlingo

Foto menika rikala kula lan kanca kula namanipun Wuri lan Ara plesir wonten Hutan Pinus, Dlingo, Bantul.

Mie Nyinyir

Mie Nyinyir

Kaya jenenge mie nyinyir, rasane pedes banget. Mie iki isa dituku ning Jalan Godean km 4,5 cedhak Giant. Warung Mie Nyinyir ana ing sisih tengen yen kowe saka wetan. Regane ya murah ming 7500 kanggo miene lan 2500 yen arep ditambah topping kayata ayam teriyaki, ayam jamur lan liya-liyane. Ing kene ya disediakke ombenan kayata teh, jeruk lan liya-liyane. Rasane lumayan enak, yen kowe ora seneng pedes ana mie original yaiku mie sing ora diwenehi sambel ananging yen koe seneng pedhes ana mie nyinyir level 30. 

Kaliurang

Kaliurang

Dina minggu Aku dolan ning omahe Wuri ing Tempel. Omahe lumayan adoh tak tempuh kanggo montor kira-kira 30 menit. Tekan omahe Wuri aku disuguhi akeh banget panganan kayata lempeng, salak, peyek lan liya-liyane. Karo mangan panganan sing wis disuguhi Aku lan Wuri cerita-cerita ananging saya suwe saya bosen banjur Wuri muni "Ul ayo neng Kaliurang wae" "Ya ayo Wur ketoke penak banget iki nek mrana" saurku. Banjur Wuri salin klambi sing luwih wangun dianggo lunga "Ayo Ul aku uwis siap" banjur Aku lan Wuri numpak motorku sing tak parkir neng ngarep omahe Wuri. Aku lan Wuri ora pamit wong tuwane Wuri amarga lagi ning sawah. Ora suwe saka omahe Wuri tekan Kaliurang namung 15 menit. Aku lan Wuri banjur markir motor lan mlebu Wisata Kaliurang. Hawane adem banget, akeh uwit-uwitan ning kana. Banjur Aku lan Wuri foto-foto lan lingguhan karo mubengi Kaliurang. "Subhanallah endahe pandamel-Mu Gusti.." kandhaku.

Ponakanku sing Ayu Dhewe

Ponakanku sing Ayu Dhewe

Aku duwe ponakan. Bocahe ayu tapi kemayu. Ya kepeneran kaya jeneng e, Kenes Ayu Rengganis Yudhantoro sing duwe teges putrine Pak Yudhantoro sing ayu lan kemayu. Kenes bocahe iyik banget, apa-apa ditekoni tapi kuwi awujud kapinterane bocah pengen reti apa-apa. Kenes seneng banget gawe uwong liya guyu karo polahe. Kenes saben dina dolan ning omahku, nek wis neng jero omah mesthi sing digoleki kursi biru banjur mengko ditumpaki karo diseret-seret rana rene karo guya guyu dhewe. 

Ketemu Artis

Ketemu Artis

Aku lan Nica ketemu artis jeneng e Dion Wiyaka ing Pasti. Mas Dion Wiyaka pemain FTV luwih bagus raine nek delok langsung timbang saka tivi. Rasane bungah banget.

Museum Sonobudaya

Museum Sonobudoyo

Aku lan kanca-kanca kelas PBD B 2016 lunga menyang Museum Sonobudoyo amarga entuk tugas saka dosen dikongkon delok naskah jawa kuna. Museum Sonobudoyo panggone ana ing cedhak Alun-Alun Utara. Aku mrana bonceng numpak motor e kancaku jeneng e Nica. Ora patio adoh saka kampus tekan Museum Sonobudoyo namung 15 menit. Aku lan kanca-kancaku mlebu Museum Sonobudoyo sakdurung e bayar sikik, regane tiket 3000 rupiah per uwong ananing amarga Aku lan kanca-kancaku rombongan dadi entuk diskon dadi 2500 per uwong. Neng njero museum akeh banget barang-barang pra sejarah kayata duit jaman bien, kapak persegi lan liya-liyane. Nanging Aku lan kanca-kanca ora lali tujuan e awakdhewe mrene yaiku delok naskah jawa kuna. Banjur Aku lan kanca-kanca takon marang sing jaga banjur sing jaga duduhake panggon sing dinggo nyimpen naskah jawa kuna lan didelokke Aku lan kanca-kancaku. Sakwise Aku lan kanca-kancaku foto kanggo bukti kanggo dosen e supaya percaya banjur mulih. 

Resensi Serat Pedhalangan Lampahan Harjuna Wiwaha

Resensi Serat Pedhalangan Lampahan Harjuna Wiwaha

Identitas Buku

1.     Irah-Irahan            :         Serat Pedhalangan Lampahan Harjuna Wiwaha

2.     Panganggit            :         Diyono, BA.

3.     Panerbit                 :         CV. Cendrawasih

4.     Kacithak Wonten  :         Sukoharjo

5.     Kacithak Warsa     :         1997

6.     Cacahing Kaca      :         156 Kaca

Serat Pedhalangan Lampahan Harjuna Wiwaha dening Diyono, BA menika nyariosaken lampahing Raden Harjuna. Lampahan Harjuna Wiwaha menika nggadhahi teges “Perkawinan Harjuna” syair menika dipun serat dening Mpu Kanwa ingkang gesang nalika jaman Raja Airlangga, raja wonten Jawa Timur warsa 1019-1042. Harjuna menika salah satunggaling lakon saking Mahabharata. Wonten menika ipun cariosaken kados pundi Harjuna tapa brata wonten redi Himalaya gadhah kekarepan supados pikantun kasaktian kangge merangi para gandarwa. Lampahan Harjuna Wiwaha menika dipun damel kanthi adhedhasar pangertosan buku antawisipun lampahan Makutharama babon Ki Wignyosutarno, lampahan Irawan rabi dening Ki Noyowirongko alias Atmocendhono, serat lampahan Dewaruci dening Sudarko S.Kar. lan buku sulukan dening Ki Darsomartono lan sanes-sanesipun.

Wonten pambuka menika dipun cariosaken menawi dalemipun para Dewa utawi Bathara Indra dipun ancem kaliyan para Gandarwa ingkang dipun pimpin dening raja ingkang kagungan nama Niwata Kawaca. Namung tiyang sekti ingkang saged mupusaken kadurjanan menika. Piyambakipun sampun siap kangge nyerang lan nremukake kahyangan Bathara Indra. Niwatakawaca boten saged dipunkawonaken kaliyan sinten kemawon, mbok menika Dewa utawi buta sanesipun. Amargi menika, Bathara Indra badhe nyuwun biyantu kaliyan tiyang kangge nglawan buta kasebat. Tiyang ingkang dipun suwuni pitulung menika namanipun Arjuna putra tengah Pandawa ingkang kala semanten saweg mertapa wonten Gunung Indrakila.

            Ananging sakderengipun Bathara Indra nguji kasabaran Harjuna menawi nglampahi tapanipun. Pitu widadari ingkang ayu-ayu dtimbali kangge nglampahi tugas menika. Widadari ingkang langkung wigati saking pitu widadari menika namanipun Suprabha lan Tilottama ananging boten saged godhani Harjuna. Saklajengipun rajanipun para Dewa inggih menika Dewa Indra ingkang badhe nguji Harjuna.Dewa Indra menika muncul dados wujud Resi ingkang dukani Hrjuna menawi tapa brata Harjuna ingkang sampun dilampahi menika namung ngoyak pambebasan piyambakipun. Harjuna mangsuli menawi kaslametan piyambak menika sanes ancasipun, ananging kaslametan tiyang sanesipun. Dheweke kepengin biyantu kaluwarganipun saking perang pungkasanipun. Raja Gandarwa badhe mateni Harjuna, Dheweke ngutus celeng ingkang gadhah nama Momong Murkakangge ganggoni tapa Harjuna ananging Harjuna saged mateni celeng kasebat. Ananging nalika Harjuna ngeculke panah, Bathara Siwa ugi ngeculake panah dening celeng kasebat satemah kalih-kalihipun panah wau dados setunggal lan mateni celeng kasebat. Lajeng padha rebutan sinten ingkang mateni celeng kasebat. Menika ugi ujian kangge Harjuna, boten kepareng sombong. Ananging Harjuna saged ngliwati ujian kasebat lan dipunparingi panah ajaib ingkang gadhah nama Pasopati. Lan tapa bratanipun sampun pungkasan.

            Utusan saking khayangan dhateng nyuwun pambiyantu saking Harjuna kangge perang lawan Niwata Kawaca. Harjuna boten seneng ananging tetep sarujuk. Dipun damel rencana kangge perang menika. Kaliyan biyantu saking widadari Supraba ingkang sampun dipun lamar dening raja Gandarwa lajeng Harjuna mangertos rahasia Niwata Kawaca menawi pucuk ilathinipun kena dheweke bakal mati. Lajeng perangipun dipuntindhakake lan Harjuna saged ngeculke panahipun lan ngenani lathinipun Niwata Kawaca lan mati.

Kekurangan

1.      Bahasa ingkang dipun angge angel dipun mangertosi

2.      Kertas ingkang dipun angge buram satemah angel dipun waos

3.      Boten wonten daftar isinipun

Kelebihan

1.      Isinipun sampun lengkap

2.      Sampulipun sae amargi gadhah kathah werna werni

3.       wonten kathah tuladha ingkang saged dipun tuladha saking serat menika